ચોરાઉ વાયર-કાર-મીની ટ્રક સહિત રૂપિયા સાડા આઠ લાખની માલમતા સાથે તસ્કર ગેંગના ૭ સભ્યો ઝડપાયા

જામનગર મોર્નિંગ - જામનગર

જામનગર જિલ્લાના ધ્રોલ નજીક હરીપર ગામ પાસે આવેલા સોલાર પ્લાન્ટમાંથી રૂપિયા બે લાખની કિંમતના વાયરની ચોરી થઈ ગઈ હતી, જે ચોરીનો ભેદ ધ્રોલ પોલીસે ઉકેલી નાખ્યો છે, અને ચોરાઉ વાયર-કાર-મીની ટ્રક-મોબાઈલ ફોન સહિત રૂપિયા સાડા આઠ લાખની માલમતા સાથે તસ્કર ગેંગના સાત સભ્યોની અટકાયત કરી લીધી છે.

ધ્રોલ નજીક હરીપર ગામ પાસે એક સોલારનો પ્લાન્ટ આવેલો છે, જે પ્લાન્ટમાંથી આજથી બે દિવસ પહેલા રૂપિયા બે લાખની કિંમતના વાયરની ચોરી થઈ ગયાની ફરિયાદ ધ્રોલ પોલીસ મથકમાં નોંધાવવામાં આવી હતી, જે ફરિયાદના અનુસંધાને ધ્રોલની પોલીસ ટુકડી હરકતમાં આવી હતી, અને જુદા જુદા સીસીટીવી કેમેરાઓ વગેરે ચકાસ્યા હતા, અને રાજેશભાઈ મકવાણા, કલ્પેશભાઈ કામરીયા, રઘુવીરસિંહ જાડેજા અને કરણભાઇ શિયારને બાતમી મળતા પીઆઇ એચ.વી. રાઠોડના માર્ગદર્શન હેઠળ તસ્કરો સુધી પહોંચવામાં પોલીસને સફળતા સાંપડી છે.

ઊંડાણપૂર્વકની તપાસના આધારે તસ્કર ગેંગને ઝડપી લીધી હતી અને કુલ ૭ શખ્સો પોલીસના હાથમાં આવ્યા હતા. તેઓ પાસેથી ચોરાઉ વાયરનો જથ્થો, કે જે સળગાવી નાખવાનો પ્રયાસ કર્યો હતો, તે વાયર ઉપરાંત એક કાર, એક ટાટા ૪૦૭ મીની ટ્રક ઉપરાંત ચાર નંગ મોબાઈલ ફોન વગેરે સહિત રૂપિયા સાડા આઠ લાખની માલમતા કબજે કરી લીધી છે.

જયારે તસ્કર ગેંગના સાત સભ્યો ધ્રોલ નજીક માવપર ગામના પાટીયા પાસેથી આરોપીઓ ભચાઉ કચ્છના વતની મામદભાઈ સીદીકભાઈ ત્રાયા, અંજારના વતની બીલાલ ઉર્ફે મોસીન જુસબ હીંગોરજા સંધી (ઉ.વ.૨૧), અઝરૂદીન ગુલમામદ હીંગોરજા, નાની ચિરાઈ ગામના ઇમરાન ભચુભાઈ નાગડા, ભચાઉ કચ્છના હાજી ભચુભાઇ નાગડા, અંજાર કચ્છના રફીકશા અલીશા શેખ અને મોહસીનઅલી મહમદયુસુફ ગરાસીયા કરી લીધી છે અને રિમાન્ડ પર લેવા કાર્યવાહી હાથ ધરી છે. તેઓ દ્વારા અન્ય કેટલાક ગુનાઓ આચરવામાં આવ્યા હોવાનું પણ ધ્યાનમાં આવ્યું છે.