એટીએસને જોઇને ડ્રગ પેડલરોએ પેકેટ દરિયામાં ફેંકી દીધા હતા, જે કિનારે તણાઇ આવ્યા

જામનગર મોર્નિંગ - અમદાવાદ 


ઈન્ટરનેશનલ ડ્રગ્સ સિન્ડિકેટ દ્વારા પાકિસ્તાનથી ડ્રગ્સનો જથ્થો ભારતીય જળસીમા માફરતે જ દુનિયાના દેશોમાં મોકલવામાં આવતો હોય છે. જોકે એટીએસ અને અન્ય એજન્સીઓ દ્વારા આ ડ્રગ્સ ઝડપી લેવામાં આવી રહ્યું છે. બે દિવસ પહેલાં જ જખૌના દરિયાકિનારેથી 40-50 નોટિકલ માઇલ દૂર પાકિસ્તાની બોટમાં સાાત પાકિસ્તાની પેડલર મોટા પ્રમાણમાં ડ્રગ્સ લઇને આવી રહ્યા છે તેવી બાતમી મળતા એટીએસ અને એજન્સીઓએ તેમને દરિયામાં જ આંતરી લીધા હતા. એટીએસની ટીમને જોઇને ડ્રગ્સ માફિયાએ ડ્રગ્સનો જથ્થો દરિયામાં ફેંકી દીધો હતો. જે તણાઈને જખૌના દરિયા કિનારે આવ્યો હતો. ~ 250 કરોડના આ ડ્રગ્સના જથ્થાને કબજે લઇ એટીએસની ટીમે વધુ તપાસ શરૂ કરી છે. 



પાકિસ્તાનના પીશ્કાન ગ્વાદર બંદરેથી અલ નોમાન નામની બોટ નશીલા પદાર્થ લઇને ગુજરાના જખૌ આવવા રવાના થયાની બાતમી મળતાં જ એટીએસ અને કોસ્ટગાર્ડની ટીમ દરિયામાં પહોંચી ગઇ હતી અને મધદરિયે અલ નોમાન બોટને આંતરી લીધી હતી. એટીએસની ટીમને જોઇ પાકિસ્તાની નાગરિકોએ ડ્રગ્સનો જથ્થો દરિયામાં ફેંકી દીધો હતો. જોકે એટીએસ દ્વારા સાત નાગરિકોની ધરપકડ કરી પૂછપરછ કરાઈ રહી છે. પાકિસ્તાની નાગરિકો દ્વારા દરિયામાં ફેંકી દેવાયેલા ડ્રગ્સના થેલા દરિયામાં શોધવાની કવાયત પોલીસે શરૂ કરી દીધી હતી ત્યારે જ બીએસએફ અને મરીન પોલીસે જખૌના દરિયા કિનારેથી આવા જ બે થેલા મળી આવ્યા હતા. તરત જ ગુજરાત એટીએસનો સંપર્ક કરી તેમની પાસે રખાયેલા પાકિસ્તાની નાગરિકોને આ થેલા બતાવતાં તેમણે આ થેલા પોતાની સાથે જ લાવ્યા હોવાની કબૂલાત કરી હતી. બન્ને થેલામાંથી 50 કિલો ડ્રગ(હેરોઇન) મળી આવ્યું હતું જેની કિંમત 250 કરોડ થાય છે. આ ડ્રગ્સનો જથ્થો પાકિસ્તાની ડ્રગ્સ માફિયા રાહીદ અને શહાબ દ્વારા બેટ દ્વારા ગુજરાતના દરિયાકિનારામાં ઘૂસાડવાની કવાયત શરૂ કરાઈ હતી. જે કવાયત અંતર્ગત સાત પાકિસ્તાની ડ્રગ્સ લઇને ગુજરાત આવવા નીકળ્યા હતા. આ ડ્રગ્સનો જથ્થો ગુજરાતમાં  કોને પહોંચાડવાનો હતો તેની તપાસ ચાલી રહી છે.