જામનગર મોર્નિંગ - દેવભૂમિ દ્વારકા

ખંભાળિયા તાલુકાના પ્રજાજનોના વ્યક્તિગત પ્રશ્નોનો ઉકેલ અને સેવાઓ તેમના રહેઠાણના નજીકના જ વિસ્તારમાં મળી રહે તે હેતુથી મહાનગરપાલિકા અને નગરપાલિકાઓમાં સેવા સેતુ કાર્યક્રમનું આયોજન કરવામાં આવે છે. ખંભાળિયા નગરપાલિકાનો સેવા સેતુ કાર્યક્રમ 4 જૂનના સવારના 9 વાગ્યાથી યોગ કેન્દ્ર, નગરપાલિકા ગાર્ડન ખાતે યોજાશે. જેમાં ખંભાળિયા નગરપાલિકાના તમામ વોર્ડનો સમાવેશ થશે.

આ ઉપરાંત 4 જૂનના સલાયા નગરપાલિકાનો કાર્યક્રમ નગરપાલિકા કોમ્યુનિટી હોલ, ડી.વી.નગર, સલાયા ખાતે સવારે  9 વાગ્યાથી  યોજાશે જેમાં  સલાયા નગરપાલિકાના તમામ વોર્ડનો સમાવેશ કરવામાં આવ્યો છે. અને કોઠા વિસોત્રી પ્રાથમિક શાળા ખાતે સવારે 9 વાગ્યાથી ખંભાળિયા ગ્રામ્યનો સેવા સેતુ કાર્યક્રમ યોજાશે જેમાં હર્ષદપુર, હરીપર,કબર વિસોત્રી, સોડસલા, પરોડીયા, ગોઈંજ, કાલાવડ, સીમાણી, ચુડેશ્વર, કુવાડિયા, સામોર,કોઠા વિસોત્રી, ઉગમણા બારા, દખણા બારા, વચલા બારા અને આથમણા બારાનો સમાવેશ થશે. 

આ સેવા સેતુ કાર્યક્રમમાં સવારના 9:00 થી 11:00 દરમિયાન અરજીઓ સ્વીકારવામાં આવશે અને બાદમાં તેના નિકાલની કાર્યવાહી હાથ ધરવામાં આવશે તેમ મામલતદાર કચેરી, ખંભાળિયાની યાદીમાં જણાવાયું છે.